urmiye    

"کیچیک بیر تورک دونیاسیدیر بیزیم اورمو" ... آذربايجان گؤزلدير. بو سؤزون ان اعتيبارلی تانيغی(شاهيدی) ائله بيزيم اورمودور. هه يه اورمو؛ زنگين اعجازلی تورپاغی، ياشيل- مئيوه لی باغلاری، تميز هاواسی، گزمه لی-دولانمالی يئرلری، سئحيرلی- دوزلو گؤلو، اوزومو، دوشابی، نوغولو ايله…خاريق العاده توريزم جاذيبه لری ايله تاماشاچيسينی حيرتلنديرن، شاشيردان اورمو.
اسکی تورک بويلاری، تورک طايفالارينين آدينا بيزيم اورمونون کندلری آدی اولاراق راست گليريک، بورادا چئشيتلی تورک لهجه لری دانيشيلير، آذربايجان، آنادولو و تورکمن آشيق صنعتلرينين اؤزه لليکلری، اورمو آشيق مکتبينده گؤرونمکده دير، بورادا موسلمان تورکون شيعه سی، سوننوسو، اهلی- حقی ياشايير. کيچيک بير تورک دونياسيدير بيزيم اورمو.
بيزيم اورمونو قوروماق، اونو ائله اؤزوموز کيمی دئييل اؤزوموزو فدا ائتمکله قوروماق، اورمودان موغايات اولماق، اوندان گؤز ببه ييميز کيمی موغايات اولماق، اونو حيفظ ائتمک، آذربايجانيميزين- وطنيميزين گؤزلليکلرينی، تورک دونياسينين اؤزه لليکلرينی تمثيل ائدن اورمويا، آذربايجانين ايستانبولو اولان اورمويا بورجوموزدور. بو تورپاغين اوغروندا شهيد دوشن، ميلی موجاديله ميز يولوندا بو تورپاغی آل قانلاری ايله سوواران يوزلر شهيده بورجوموزدور. بورجوموزو اؤده مه­ليييک، وطنه، آذربايجان ميلتينه، محمدامين آزاد وطنلره، ابراهيم صابونچولارا، ميياوالی عبدالرحمانلارا، دوکتور ذوالفقاریلره و …
اورمودا، اورميه ده آذربايجان تورک وارليغينی عکس ائتديرن هر نه يی دونيا اجتماعياتينين گؤز اؤنونه سرگيله مه­ليييک. بونو ياپماق اوچون باشقالارينی اينکار ائتمکدنسه اؤزوموزو ايثباتلاماق ان گئرچک و ان گووه نلی يولدور، دئيه اينانيرام.